11 iyun 2022-ci il tarixində Azərbaycan dövlət Filarmoniyasının kamera və orqan musiqisi zalında Qara Qarayev adına Mərkəzi İncəsənət məktəbinin məzunlarının möhtəşəm və təntənəli şəkildə “Məzunlarımızla fəxr edirik” adlı tədbiri keçirildi. Onu da qeyd edək ki, məzun günü musiqi məktəbləri arasında ilk dəfə olaraq,məhz Qara Qarayev adına Mərkəzi İncəsənət məktəbi tərəfindən təşkil olundu. Tədbirdə məktəbin bütün şöbələri üzrə müxtəlif alətlərin ifaçıları yüksək səviyyədə çıxışlar nümayiş etdirərək, dinləyicilərin böyük alqışları ilə qarşılandı.
Məzun gününün ideya müəllifi məktəbin Tədris işləri üzrə direktor müavini Mənsurə Quliyeva, təşkilatçıları isə musiqişünas Nərgiz Kərimova və rəqs müəllimi Emil Pənahov idi. Musiqişünas Nərgiz Kərimova tərəfindən nəfis və zövqlü şəkildə hazırlanmış ssenari dinləyicilərin böyük marağına səbəb oldu.
Səhnəyə dəvət olunan hər bir iştrakçı ixtisas müəllimlərinin onlara olan ürək sözlərini video sujet şəklində izlədi. Olduqca kövrək anlar yaşayan məzunlarımız ilk növbədə məktəbin müdriyyətinə və müəllimlərinə dərin minnətdarlıqlarını göz yaşları içində bildirərək, son ifalarını ixtisas müəllimlərinə həsr etdilər.
Tədbirdə Azərbaycan Respublikası Mədəniyyət Nazirliyinin nümayəndələri, Bakı Şəhər Mədəniyyət Baş İdarəsinin rəisi İbrahim Əliyev, məktəb direktorları və digər dövlət qurumlarından təşlif buyurmuş qonaqlar iştrak edirdi.
Tədbir zamanı Koxlear implantlı uşaqlar qrupu üçün xüsusi bir şou proqram hazırlanmışdı. Konsertin sonunda məktəbin direktoru, Azərbaycan Respublikasının Əməkdar artisti, dosent Əziz Qarayusifli Azərbaycan Respublikası Mədəniyyət Nazirliyinə, tədbirdə iştirak edən bütün qonaqlara təşəkkür etdi və öz ürək sözlərini, məzunlara olan təbriklərini bildirdi.
Tədbiri Koxlear implantlı uşaqlar qrupunun (bədii rəhbər: Emil Pənahov) “Yallı” rəqsi yekunlaşdırdı. Əminik ki, Qara Qarayev adına Mərkəzi İncəsənət Məktəbinin ərsəyə gətirdiyi bu tədbir hələ uzun müddət onu seyr edən dinləyicilərin yaddaşından silinməyəcək.
