28 fevral 2023-cü il tarixində Qara Qarayev adına Mərkəzi İncəsənət Məktəbində professor Elxan Babayevin xatirəsinə həsr olunmuş tədbir keçirilib.
Tədbirin təşkilatçısı və aparıcısı Qara Qarayev adına Mərkəzi İncəsənət Məktəbinin müəllimi, musiqişünas Pərvin Səfərli öz çıxışında Elxan Babayevin həyat və yaradıcılığı haqqında video slaydlar vasitəsilə tədbir iştirakçılarına ətraflı məlumat verib.
Lap kiçik yaşlarından Elxan müəllimin təlim və tərbiyəsini əxz edən yetirmələrdən biri olan məktəbin direktoru, Azərbaycan Respublikasının Əməkdar artisti, dosent Əziz Qarayusifli müəllimi haqqında xatirələri ilə bölüşüb və şagirdi Hüseyn Gözəlov ilə birlikdə həmişə olduğu kimi klarnetdə möhtəşəm ifası ilə tamaşaçıları sevindirib.
Tədbirdə Azərbaycan Dövlət Akademik Opera və Balet teatrının Simfonik orkestrinin solisti Vəli Budaqovun, məktəbin məzunu Mənzurə Abdurrəhmanovanın, BMA-nın müəllimi Anar Məmmədovun şagirdlərinin (Hüseyn Rzayev və Məhəmmədəli Paşazadə), məktəbin şagird və müəllimlərinin gözəl ifaları səslənib.
Azərbaycan Respublikasının Xalq artisti, Azərbaycan Respublikası Müdafiə Nazirliyi Şəxsi Heyət Baş İdarəsi Hərbi Orkestr Xidmətinin rəisi, professor, General-mayor Yusif Axundzadə, Azərbaycan Respublikasının Əməkdar İncəsənət xadimi, professor Zümrüd Dadaşzadə, Azərbaycan Respublikasının Əməkdar İncəsənət xadimi, professor Nəzmiyyə Abbaszadə, Azərbaycan Respublikasının Xalq artisti, professor Zəhra Quliyeva, Azərbaycan Respublikasının Əməkdar İncəsənət xadimi, bəstəkar, professor Məmmədağa Umudov, Azərbaycan Respublikasının Əməkdar İncəsənət xadimi, professor Həcər Babayeva, Azərbaycan Respublikasının Xalq artisti, professor Müzəffər Ağamalızadə, sənətşünaslıq üzrə elmlər doktoru, professor Aytac Rəhimova və s. qonaq qismində tədbirdə iştirak edərək Elxan müəllimlə bağlı xatirələri ilə bölüşüblər.
Tədbirin sonunda Azərbaycan Respublikasının Əməkdar incəsənət xadimi, professor Həcər Babayeva xüsusilə məktəbin direktoru, Azərbaycan Respublikasının Əməkdar artisti, dosent Əziz Qarayusifliyə müəllimini heç vaxt unutmadığına görə, tədbirin təşkilatçısı və aparıcısına, iştirakçılara və qonaqlara öz təşəkkürünü bildirib.